Добродојдовте на web страната на БАС

Почитувани,

Додека ги одбројуваме последните денови на 2011 година сакам со Вас да ги споделам клучните настани и потфати кои ја обележаа оваа четврта година на постоење на Бизнис академијата Смилевски – БАС.

Годинава беше година на заокружување на потфати, но и година на нови почетоци – ги доделивме првите дипломи, нашите дипломанти ги направија првите вработувања, ги склучивме првите меѓународни партнерства, ги спроведовме првите големи проекти и ја изградивме првата зграда на Академијата.

Три години по првите уписи, во јуни оваа година, ги промовиравме првите дипломанти на БАС. Веќе во септември оваа година, повеќе од 80% од нив се работно ангажирани. Срдечно им посакуваме плодни и успешни кариери во професионалниот менаџмент!

По заокружувањето на еден полн циклус на додипломски и постдипломски студии, Академијата конечно можеше гордо да се претстави пред сродните институции во регионот. Затоа, направивме академска турнеја низ просторите на поранешна Југославија на која потпишавме спогодби за соработка со повеќе високи стручни школи и факултети за бизнис и менаџмент. Во Словенија, потпишавме меморандуми за соработка со Високата школа за бизнис и претприемаштво ГЕА Колеџ од Љубљана, со Високата школа за бизнис и менаџмент и Факултетот за бизнис економија од Ново Место, во Хрватска, со Високата школа за бизнис и менаџмент „Балтазар Адам Крчелиќ“ од Запрешчиќ. Во Србија, случивме спогодби со Факултетот за организациони науки и Високата школа за сметководство и берзанско работење од Белград. Договорени се заеднички учества на проекти, условите за мобилност на студентите и предавачите и заеднички настапи на научни конференции и собири.

Во земјата, ја формализиравме тригодишната соработка со Универзитетот на југоисточна европа во Тетово со потпишувањето на меморандумот за соработка и разбирање. Сега студентите на постдипломските студии по Стратегиски менаџмент на БАС можат своето школување директно да го продолжат на докторските студии на овој универзитет.

Оваа 2011 година беше и година на големи вложувања на Академијата. Во месец  мај, во Битола започна изградбата на зградата на Академијата која ќе биде пуштена во употреба во февруари 2012 година. Ова е модерен, ергономски изведен објект кој комплетно ќе ги задоволи сите просторно-технички услови за современа интерактивна настава.

Во октомври отпочна со работа и Менторскиот центар за вонредно студирање во Струмица, каде првата генерација вонредни студенти ги започнаа своите студии.

Крајот на оваа година го круниса основањето на Институтот за менаџмент на БАС, чија  истражувачка дејност допрва ќе ги бранува водите на бизнисот и менаџментот.

Во соработка со ДЕТРА Центар, го отпочнавме проектот Партнерство за организациско учење, како подршка на развојот на нашите Партнерски организации и склучивме дваесет нови Спогодби за партнерство со организации каде нашите студенти ја изведуваат Теренската студентска практика.

Го започнавме проектот Партнерство за вработливост во соработка со средните училишта во Македонија чија цел е зголемување на вработливоста на средношколците по завршувањето на средното образование преку осовременување на наставата по Бизнис и Менаџмент.

Дел од своите капацитети и годинава ги насочивме во полето на општествената одговорност и како наш придонес кон заедницата доделивме дваесет тригодишни стипендии на кандидатите за додипломски студии по Оперативен менаџмент. Како подршка на проектот Декада на ромите, доделивме и 5 тригодишни стипендии за припадниците на оваа заедница.

Традиционално, веќе четврта година, БАС го спроведе веќе препознатливиот Проект МОКУ – направени се повеќе од 2000 бесплатни тестирања за професионална ориентација за учениците од средните училишта низ цела Македонија.

Во партнерство со Integrity Alpha & Omega, Академијата го спроведе проектот Викенди на промена, чија цел беше меѓукултурно вмрежување на спортисти од целата земја преку тимбилдинг работилници за развивање на животни вештини.

Нашите предавачи имаа чест да бидат членови на жири комисиите на натпреварите по Бизнис кои се одржаа во рамките на Образовното рандеву на МАСУМ.

Новите вработувања во Академијата, новите доктори на науки од редовите на БАС, можностите за студирање на далечина кои ги искористија нашите студенти од Шведска, САД и Австралија, учеството на домашни и меѓународни конференции, учеството на глобалната недела на претприемаштвото во Скопје, Битола и Струмица, и новоиздадените публикации на Академијата го надополнуваат списокот на нашите годинешни вложувања и постигнувања.

Со искрени желби за плодна и успешна 2012, срдечно Ви благодарам што одвоивте време да го прочитате овој отчет со што сте чекор поблизу до нас – до БАС.

Со почит,

Проф. д-р Цветко Смилевски

Директор

Бизнис академија Смилевски – БАС